Eo am-panamboarana ny kianja filalaovana basket vaovao eo amin’ny trano iray noravàna, izay nonenan’ny mpianatra mpanao politika tamin’ny fotoan’androny.
Navadika ho kianjan’ny fanatanjahantena ity toerana ao Ankatso ity. Herinandro eo ho eo izay no nanombohan’ny asa, raha kasaina ho vita alohan’ny faran’ny taona izao. Kianja miisa 2 no hamboarina eto, miampy ny toerana fijerena lalao sns...
Tamin’ny sabotsy teo no nijery ny fizotran’ny asa ny PDS Antananarivo, Hery Rafalimanana, izay tompon-kevitra amin’ny hanampian’ny kaominina ny oniversite, amin’ny lafiny rehetra. Tamin’io fotoana io koa no nanolorana ity kianja ity tamin’ireo mpianatra ka nandray izany ny solotenan’ny mpianatra sy ny filohan’ny CROUA. Nanolotra baolina miisa 6 sahady ny PDS, hanombohan’ny mpianatra ny lalao kitra sy basket. Iaraha-mahalala ny fahasahiranan’ny mpianatra amin’izao fotoana izao ka nanolotra vary 5 taonina ihany koa ny PDS Rafalimanana. Taorian’izay dia nitsidika ny fokontany Antsahakely ny PDS izay fokontany onenan’ny ankamaroan’ny mpianatra ao Ankatso.