Tonga teto amin’ny gazety ny filohan’ny « Tanà miray », filohan’ny fikambanan’ny mpianatra mpiavy ao amin’ny oniversiten’ny Toamasina ka nanambara fa nisy ny famonoana nataon’olona misaron-tava azy. Nalaina an-keriny izy ary nofatorana sady notondrahana lasantsy, saika hodorana velona. Votsotry ny lasantsy ny tenany rehetra, hatrany amin’ny ankasarotany. Afaka niantso vonjeo anefa izy ka hitan’ny mpianatra, izay marihana fa tao amin’ny Campus ihany no nampijaliana azy. Naiditra hopitaly izy ka tsy afaka niverina nanohy ny fianarany intsony taorian’ny faha 6 jona teo, nisehoan’ny habibiana.
Araka ny nambaran-dRakotoniaina Bienvenue José, niharan’ity habibiana ity dia vokatry ny fangatahana rariny tamin’ny mpampianatra no fototry ny resaka . Vidiana ny programa ka tsy zakan’ny mpianatra. Fanakendana teo imason’ny mpianatra no nahazo azy, araka ny fitantarany ihany.
Nanao fitarainana
Rehefa nitaraina tamin’ny lehibe tao amin’ny oniversite i José dia mbola tsy nisy vokany aloha hatramin’izao koa mangataka ny fitondram-panjakana ny tenany mba hijery akaiky ity raharaha ity. Mihitsoka mantsy ny fianarana ary dia nambarany fa sarotra aminy ny mbola hiverina hanohy fianarana any Toamasina. Araka ny fiheveran’ity mpianatra ity ihany dia mamofompofona resaka foko ny raharaha satria dia voatonon’ireo mpaka an-keriny azy hatrany ny foko aty am-povoan-tany. Voalaza aza fa nisy taratasy nentin’ireo mpaka an-keriny hitan’ny mpianatra, mikaroka ny filohan’ny « Tanà miray » sy ny filohan’ny mpianatra Atsimo - Atsinanana.
