Dia mbola mikaikaika hatrany ireo mpivarotra ara-dalàna eto an-drenivohitra satria vao mainka miroborobo ny entana havoakan’ireo mpivarotra sinoa ho an’ny mpivarotra amoron-dàlana. Amin’izao voalohany izao dia tsy mahamenatra ireo mpivarotra amoron-dàlana ny manombana ny vidin’entana amin’ny vidiny avo sasaka mihoatra amin’ny eny amin’ny magazay sinoa, saingy rehefa atao ny ady varotra dia azo amin’ny antsasa-bidy ny entana. Ny kalitao aloha tsy dia tsara loatra ka mahatonga ny vidiny ho mora.
Ny mpivarotra ao amin’ny « Avance Center » etsy Andravoahangy sy ny mpivarotra ao amin’ny pavillon Analakely no efa nivondrona ka nandefa fitarainana isan’ambatonga saingy mbola sondriana tamin’ny fanomanana fifidianana ny tompon’andraikitra ka tsy nahazoana tohiny ny resaka. Araka ny fanazavan’ny tompon’andraikitra voalohany ao amin’ny « Avance Center » dia alain’ireo orinasa sinoa ny modelin’ny entana amidin’izy ireo ka afaka andro vitsivitsy dia ahavitany dika mitovy ary amidiny mora dia mora. Tsy mampaninona hoy ireto mpivarotra raha amidiny ao anatin’ny magazainy ny entany fa ity izy arantiranty eny an-dàlam-be no tsy mety. Manginy fotsiny ny fandoavana hetra isan-karazany. Voakasik’ity resaka ity avokoa ny sokajin’entana rehetra amidy amin’ny vanim-potoana fety. Io no fotoana hanoheran’ireo mpivarotra ny hetra aloany nefa izao dia songonan’ny mpivarotra tsy mandoa hetra izao. Amin’izao fotoana izao àry dia mihitsoka ny entana, tsy mandeha ny tsena ka dia hanamafy ny fitarainana efa nataony ireto fikambanan’ny mpivarotra ireto.
