Avohay ny gadra politika !

Manoloana ny raharaham-pirenena izay somary mafampana dia nanao fivoriana ny mpitantana vonjimaika ao amin’ny antoko Arema izay notarihan’ny loholon’i Madagasikara atoa Randrianirina Lucien. Nanamafy ny antoko fa tokony hotanterahina ny fampiharana ireo fepetra fototra notakian’izy ireo dia ny fanajana ny lalàm-panorenana sy ny fametrahana ny laharam-pahamehana ny fifampiresahana ao amin’ny hery politika sy ny fiaraha-monim-pirenena mba hikatsahana vahaolana hialàna amin’izao fahasahiranan’ny vahoaka malagasy izao. Takian’ity antoko ity ihany koa ny tokony hamelana tanteraka ny fahefana mpitsara, hanao ny asany malalaka. Izany moa dia nampifandraisin’ny antoko Arema amin’ny fitakiana ny hamoahana ireo gadra politika sy ireo olom-boafidy naiditra am-ponja. Karazana fanambarana miantefa amin’ny fitondram-panjakana no vontoatin’ny fivoriana teny Anosizato, omaly tolakandro.