Ny sabotsy maraina teo no nanao fanambarana ny kandida Zakahely izay milatsaka any amin’ny faritry Mananara avaratra, fa tsy matahotra ny fampitahorana ataon’ny hafa fa ho samborina ny tenany. Taorian’ny fandalovan’ingahy Sylla, filohan’ny antenimieram-pirenena tany amin’io toerana io tokoa dia nandeha ny feo fa tsy afaka ny hiatrika ny fifidianana famerenana ity kandida ity satria tsy maintsy samborina mialohan’ny fotoana. « Hitondra ny feon’ny vahoaka eny Tsimbazaza no tanjoko fa tsy hamotika tanindrazana », hoy i Zakahely, « ary na tsy omena karama sy tambiny aza tsy olana amiko, satria lehibe loatra izany fiarovana ny feon’ny Mananara Avaratra izany ».
Miantso ny mpanara-maso ny fifidianana ihany koa ny lehilahy mba hidina any amin’io faritra io, satria ilaina ny mangaraharaha amin’ny famerenana fifidianana toy izao. Miantso ny vahoaka ho tony izy mba tsy ho tafiditra ao anatin’ny vela-pandriky ny hafa. « Rovitra tanteraka ary tsy hita intsony ny afisiko anaovan’ny mpisompatra azy, kanefa aoka hazava fa ny safidim-bahoaka ihany no hitsara izao rehetra izao », hoy ihany izy namarana ny fanambarana nataony.