Ny mpanome baiko no fositra

Tao amin’ny Radio tsy miankina iray omaly no nanazavan’ny PDSn’ny faritanin’Antananarivo teo aloha, ny Jeneraly Razakarimanana Ferdinand, ny heviny manoloana ny fisamborana ireo olona manao fanamiana mitovy amin’ny miaramila. « Tsy tokony hosamborina na hampiharana herisetra izy ireny », hoy ny tenany, « fa ny fitsipika mampiavaka ny tena an’ny mpitandro ny filaminana no apetraka. Aoka hiavaka tsara ny an’ny zandary, miaramila, polisy ary ny mpiandry fonja. Tsy ny fanamborana ireny fitafiana ireny akory no hampihena ny asa-jiolahy eto ». Nankasitraka ny hanaparitahana ny miaramila any ambanivohitra ity PDS teo aloha ity, satria afaka haningotra hatramin’ny farany ny asan-dahalo izy ireny. Nankasitraka ny fandefasana ireo manamboninahitra nalefa nisotro ronono ihany koa izy satria mifanaraka amin’ny lalàna miaramila izany.