Miteraka resa-be ankehitriny ny raharaha ao amin’ny CEG Ivohitra Antsirabe, raha ny marina dia ny olana ara-bola ao amin’ny fitantanan’ny FRAM ary tsy fantatra be ihany izay tena filoha. Manoloana ny zava-nitranga dia nanambara ny lehiben’ny farimpiadidim-pampianarana Antsirabe I (CISCO Abe I) Atoa Rakotobe Jeannot Eric fa ny fananganana birao vaovao ara-dalàna no Vahaolana haingana amin’ity raharaha ity, Nambarany ihany koa fa ny olona rehetra manana-janaka mianatra ao amina sekoly iray dia tokony- hiditra ho FRAM ary afaka malalaka ho fidiana birao fa izany rehetra izany dia tokony hanaraka ny ara-dalàna . Tsara ihany koa hoy ihany ny chef – CISCO ny manamarika fa tsy tokony hiditra amin’ny raharahan’ny FRAM na ny mpampianatra na ny mpandraharaha na ny tale ao an-tsekoly ; fa ny anjaran’ny tale dia manolotra ny vinavinan’asa tokony ho atao eo an-tsekoly amin’ny biraon’ny FRAM.
Hatramin’izay mantsy raha nitsangana ny biraon’ny FRAM dia tsy nisy ny ara-dalàna na ny famindram-pahefana aza tsy mbola nisy akory. Amin’izao fotoana izao ary dia olona roa no samy mitono-tena ho filoha : ny iray Ray aman-drenin’ny mpianatra sady mpampianatra ny iray kosa mpanara-maso ny vola ao amin’ny FRAM no mbola milaza ho filoha ihany koa. Sahiran-tsaina noho izany ny Ray aman-drenin’ny mpianatra noho ny volan’izy ireo ratsy tantana. Hatreto aloha dia mbola tsy dia hitan’ireo Ray aman-dreny ny nampiasana ny volan’ny FRAM ankoatran’ny karaman’ny Mpiambina ny vola anefa aloa ihany ny 5000 Ar isan-taona ary manodidina ny 1280 ny ray aman-drenin’ny mpianatra ao an-tsekoly. Raha ny hita aloha dia ratsy dia ratsy ny sekoly tsy mba nisy ny fanamboarana.
Efa nisy ny fangatahana natao eny anivon’ny fahefana mahefa amin’ny fanaraha-maso ny fomba fitantanam-bola eo anivon’ny FRAM ary efa an-dalan’izany amin’izao fotoana izao. Ny mpampianatra ao an-tsekoly moa dia voakitikitika amin’izao raharaha izao, no izy ireo lazaina fa mitady hitantana ny volanny FRAM ka izay no anton’ny fanambarana.